en construción

construcións nas pontes

2009-05-22T09:22:00.004+01:00

con algo de retraso, aquí van as fotos da presentación de construcións nas pontes o pasado 14 de maio.
este é o público (homenaxe a isaac díaz pardo).

e esta é a construción:

foi un recital amábel. sentinme a gusto no meu retorno á biblioteca das pontes na que coordinara un obradoiro literario durante algúns anos.
e penso que a xente quedou contenta. cando menos, vendéronse uns cantos libros e recibín varias felicitacións.

voltarei ás pontes o próximo 5 de xuño como poeta convidado do grupo alalá que celebra ese día o seu recital de primavera.

carral na casa

2009-05-11T08:26:00.002+01:00

así... sen facer ruído... o premio de poesía de carral volve á casa. e recibímolo encantados!

esca e pedra

2009-05-06T14:32:00.003+01:00

hai algunhas semanas que non comento as publicacións de esca e pedra...
desta volta, unha hortaliza que me encanta.

hai un par de semanas, publiquei o primeiro poema con foto en cor. non estaba completamente en cor, pero a foto pareceume preciosa e precisa para o texto en cuestión: unhas mazás máxicas.

esta semana, metinlle man á foto dos ravos que atopei en wikimedia commons e penso que quedou unha foto xeitosa. non son os clásicos ravos de bandexa de poliestireno expandido pero isto é poesía :-P

mércores en ruta

2009-05-04T09:08:00.003+01:00

o mércores pola mañá cediño, lucía aldao e mais eu collemos estrada cara a chantada. aló, no ies lama das quendas agardábanos unhas cantas sorpresas.

os alumnos e as alumnas de bacharelato, ao mando de susana, a súa profe de galego, preparan unha semana da poesía na que se implican como poucas veces vin.

ela dálles a escoller un libro de poesía actual dunha lista máis ou menos grande e, en todo caso, ben curiosa, e despois preparan unha serie de artefactos (cada libro, un artefacto) cos que montan unha exposición para tentar convencer aos demais alumnos do centro de que o libro paga a pena ser lido.

a imaxinación desta xentiña é abraiante.

aquí poño algunhas fotos para que vexades cousas que fixeron a partir dos meus lúa gris e derrotas.

como remate da semana, organizan un recital poético. este ano tocounos a lucía e mais a min. foron dúas horas de clase con dous grupos diferentes. preparan unhas presentacións lírico-informativas moi ben curradiñas e despois o recital lévase ben a pesar de que aló hai moita xente metida dentro dunha sala grande e sen micros.

a min, que me costa moito recitar a berros, quedoume a sensación de que todo o mundo oía e atendía.

tamén fixeron un vídeo a partir dun dos poemas. teño que pelexarme un pouco co youtube para subilo. xa vos contarei en canto o teña.

como sempre, aquí deixo a foto dunha das construcións de pola mañá:

pola tarde presentei construcións na biblioteca de poesía uxío novoneyra de culleredo. non había demasiada xente pero o recital foi bonito e tiven ocasión de coñecer o historiador do concello que é tamén un dos técnicos de cultura, carlos pereira. un tipo interesante e intelixente que se currou unha presentación do acto en tempo record (e non só copiando e pegando de internet) e co que compartimos un café ao remate do acto que agardo non sexa o último.

conxo

2009-04-06T12:07:00.009+01:00

tamén tiña pendentes as fotos do recital con motivo do banquete de conxo.

desta vez, na homenaxe a díaz pardo, aparecen entre o público as miñas compañeiras de cartel: alba cid, emma pedreira, olalla cociña, maría lado e lucía aldao.

onde está wally?

arriba á esquerda, con camiseta amarela, lucía aldao. ao seu lado, maría lado.
no terceiro chanzo, a terceira empezando pola esquerda é alba cid. xusto encima dela, tamén de morado, olalla cociña. e encima de olalla, algo á esquerda, emma pedreira.

eu non saio, porque estaba sacando a foto. pero si sae a construción:

e aquí tendes as poetas en plena tarefa por rigorosa orde de aparición:

alba cid

olalla cociña

emma pedreira

aldao+lado

vigo

2009-04-06T12:00:00.007+01:00

con algo de retraso, algunhas fotos da presentación de construcións libro en andel, de vigo.

construcións en vigo e máis

2009-03-23T16:30:00.003Z

o próximo xoves 26 de marzo estarei en vigo presentando construcións. será na libraría andel ás 20:00.

o venres pola mañá darei unha conferencia no centro sociocultural da república independente de conxo para alumnos do instituto compostelán eduardo pondal. o tema: "blogs de literatura".

prometo postear en mirar para este lado un resumo do que alí se fale.

pola noite, na conmemoración do banquete de conxo, participarei dun recital poético no mesmo sitio.

entre unha cousa e outra teño sesión de obradoiro literario en fene polo que poden ir botando contas dos kilómetros da semana...

construcións nominado aos premios aelg 2009

2009-03-23T16:27:00.002Z

non é moito mérito, porque categoría de poesía están nominados nada menos que 12 títulos! pero este meu construcións é un deles.
agradezo ás persoas que o votaron, facendo posíbel chegar a este punto da competición.
e agradezo, unha e mil veces a paco macías, o editor que fixo posíbel que isto chegase a tan bo porto.

os veos e máis

2009-03-06T08:22:00.002Z

a presentación d'os veos da paisaxe en ferrol, con sesión aberta do obradoiro literario foi, penso, un éxito.
había xentiña nova, piñeiro contounos de que ía o asunto das edicións artesanais, eu contei un pouco a historia deste libro e fixemos un pequeno xogo que deu de si, penso...
hai unha crónica en certo.es.
agora toca poñer a cabeza noutro lado.
para seguir, esta semana saíu un novo (e bastante ilustrado, como correspondía ao tema) poema da serie esca e pedra...

johann joachim winckelmann

2009-02-25T15:02:00.001Z

novo poema da serie esca e pedra.
desta, o asasinato do "fundador" da historia da arte. nada menos.

presentación do libro os veos da paisaxe

2009-02-24T16:37:00.003Z

este venres 24 de febreiro presentarei a edición en papel do meu libro os veos da paisaxe na galería sargadelos de ferrol.

para a ocasión, faremos unha especie de sesión aberta do obradoiro literario de fene.

participará da sesión, antonio piñeiro, editor do libro. haberá un pequeno recital poético e faremos unha actividade sinxela de escrita a partir das fotografías da exposición "os veos da paisaxe".

o libro estará á venda ese día na presentación e, como se trata dunha edición de só 80 exemplares, non sei se será viábel dar con el en moitos sitios.

bibliófilos! amigos! parentes! parentes dos amigos! amigos dos parentes! mascotas dos bibliófilos! vila toda de ferrol! cidadáns da moi grande e noble comarca de ferrolterra! acudide en masa!

clube de poesía de carral

2009-02-11T12:16:00.003Z

onte estiven convidado nunha tertulia do clube de poesía de carral. é un grupo de xente que escrebe e se reúne na biblioteca municipal para ler os seus textos.

conteilles un pouco a miña experiencia literaria e aproveitei para falar de diferentes asuntos que se foron cruzando.

estiveron ben atentos á conversa e mais fixeron unhas cantas preguntas cando decidín pechar a boca por fin.

son xente interesada polo quefacer da escrita e con ganas de aprender.

deilles unha serie de ideas a propósito de empezar a facerse lecturas críticas entre eles. penso que un obradoiro literario como o de fene podería serlles de utilidade. a algúns deles polo menos.

había tempo que non ía pola biblioteca municipal de carral.
a última vez fora para a entrega do premio de poesía a marcos calveiro.

antes, fora dúas veces cando me tocou a min recoller o premio e presentar o meu libro gañador do certame, derrotas.

parece que foi hai séculos...

telde

2009-02-11T12:10:00.002Z

hoxe publícase un novo poema da serie "esca e pedra". o artigo da galipedia é sobre unha vila da illa de gran canaria pero eu derivei o asunto a un barco de emigrantes (canarios e outros) que foi para cuba alá polo 1919.

os veos da paisaxe en bourel

2009-02-03T22:18:00.004Z

hoxe chegaron ás miñas mans os tres primeiros exemplares da nova edición en papel d'os veos da paisaxe, feita polas mans artesás de antonio piñeiro.
este será o meu exemplar icónico da edición:

non sei se o contei aquí pero a edición consta de 80 exemplares cosidos e colados a man, ilustrado cada un deles cunha serie orixinal de cinco fotografías (unha na portada e o resto no interior).
leva o número 77.
a serie é "orixinal" porque está impresa en papel fotográfico e pegada a man cada foto en cada exemplar e mais porque cada unha das cinco fotos é única. non se repite ningunha foto dun exemplar para outro. podedes botar contas, son doadas.
aquí podedes ver o exemplar 77 acompañado polo 78 e mais o 80.

como xa anunciei e voltarei anunciar, a presentación será ao longo deste mes de febreiro na galería sargadelos de ferrol, no marco da exposición que alí temos montada o igor lugris e mais eu.

os veos da paisaxe (fotografías)

2009-01-28T15:09:00.006Z

entre o 6 e o 28 de febreiro a galería sargadelos de ferrol exporá algunhas das fotografías que conforman o meu traballo "os veos da paisaxe".

comparto espazo co meu amigo igor lugris quen amosará parte dos seus poemas visuais "poesía para ver poesía para ler".

a inauguración (con recital poético e, sobre todo, pinchitos) terá lugar o 6 ás 20.

ademais, o venres 13, se todo vai ben, presentaremos no entorno da exposición a primeira edición en papel d'os veos da paisaxe, un vello libro meu que xa viu un par de edicións dixitais (retagarda edicións en 2000 e biblioteca virtual galega xa non sei en que ano).

o libro publícase grazas ás artes de antonio piñeiro en edicións bourel. son 80 exemplares artesanais que conteñen, cada un, 5 fotografías orixinais (diferentes en cada exemplar), todas da mesma serie das que se expoñen.

xa sei que a algúns de vós ferrol vos colle a desmán. con todo, comparto convosco a alegría (e os nervos propios) do evento, encantaríame vervos e agradecereivos que corrades a voz.

aquí van algunhas pequenas mostras das fotos, aínda que na expo veranse montadas en series e etcéteras adicionais que non revelarei aquí.

neptune

2009-01-21T14:01:00.002Z

novo poema da serie esca e pedra.
un grupo estadounidense de noise music é o protagonista da semana.

levo uns anos escoitando músicas que se asemellan ao que fai este grupo que non coñecía. con todo, descubrín que trasladalo a palabras non é tarefa doada.

na lonxa

2009-01-10T10:19:00.002Z

onte á noite estiven na lonxa literaria de moaña. para quen non o saiba, trátase dun grupo de xente que organiza unha tertulia literaria con escritores para falar dun libro concreto. eles chamáronme para falar de construcións.
é unha tertulia "encadeada". cada autor convidado propón o autor ou autora da seguinte tertulia.
a min propúxome (e agradézollo) verónica martínez delgado.
e eu non vou dicir a quen propuxen para non adiantarme á chamada que a tal persoa recibirá nos próximos días.
a tertulia é interesante: o grupo é heteroxéneo e todos os seus membros len o libro a conciencia e preguntan incisivamente.
quedei con pena de que falamos máis doutras cousas relacionadas coa literatura e menos do libro en si. e penso que o mesmo lles pasou a varios dos que alí estaban.
é o malo de xuntarse a falar de libros que traen polémicas extra-literarias detrás.
de todos os xeitos, a experiencia é moi satisfactoria, non sempre pode un sentarse a conversar abertamente cun grupo de lectores interesados.

entrevista en ant-tv

2009-01-07T17:49:00.001Z

hoxe sae a entrevista que me fixo bocixa para ant-tv.
pode verse aquí

monte de san trocado

2009-01-07T17:42:00.001Z

novo poema da serie "esca e pedra"

fene 2

2008-12-19T08:57:00.003Z

velaquí as prometidas fotos da presentación feitas por sonia, a bibliotecaria de fene.

fene

2008-12-15T00:07:00.004Z

o venres foi a presentación de construcións na biblioteca municipal de fene.
velaquí algunhas fotos:

para empezar, unha homenaxe a díaz pardo. unha vez escoitei a maría lado contar que, nunha época, isaac facía unha foto do público cando ía empezar un acto.

e o resultado da construción

o recital fíxeno case todo de pé. na pantalla que aparece detrás da construción fun proxectando a última versión que aparece na web de cada un dos poemas que ía lendo.

sonia, a bibliotecaria, prometeume algunha foto que, cando me envíe, colgarei aquí.

mastaba

2008-12-11T15:24:00.002Z

un novo poema de esca e pedra.
unha construción funeraria exipcia dáme pé para recuncar no tema da escrita literaria.

en construción na radio galega

2008-12-09T14:55:00.002Z

no diario cultural da radio galega chus nogueira, crítica literaria habitual do programa, falou de construcións. durante unha semaniña pódese escoitar o que dixo, indo á páxina do programa.

construcións en fene

2008-12-09T12:41:00.002Z

o próximo venres día 12 presentarei o libro na biblioteca municipal de fene. facede correr a voz entre ferrolterráns e vinde.
a biblioteca municipal de fene é un sitio amábel no que me sinto moi cómodo así que vai ser seguro unha lectura relaxada e bonita.

construcións no cultur.gal

2008-12-09T12:38:00.004Z

o sábado pasado presentamos construcións no cultur.gal.
foi un acto compartido con chelo suárez que traía a súa novela gañadora do premio de narrativa erótica que convoca edicións positivas.
aquí tendes algunhas fotos do evento.
(grazas a eli que sacou as fotos ao tempo que tentaba controlar o incontrolábel.)

presentación de construcións na coruña

2008-11-28T08:51:00.002Z

sábado 6 de decembro ás 21 no cultur.gal (palexco)
presentación de construcións na coruña.

compartindo cartel con chelo suárez que presenta "Os milagres de Cristamar" (premio positivas de narrativa erótica 2008).

agárdovos aló!

múrmask

2008-11-26T11:10:00.002Z

un novo poema de esca e pedra.
nace cunha dubida sobre o nome correcto do sitio. no resto de versións da wikipedia aparece cun n adicional: murmansk. eu non sei cirílico pero mesmo na versión rusa parece que puxese alí un n.
eu voto por que se trata dun erro da galipedia.

verme

2008-11-26T10:52:00.001Z

grazas, mario, por este post.

pergamiño sharrer

2008-11-19T11:22:00.002Z

un novo poema da wikipedia.

unha vez publicado, opinan por correo electrónico que a segunda estrofa podería quitarse.

non é doado en pleno
século vinteún

trátase dunha irrupción valorativa do "narrador" que non se mantén no resto do poema. quer dicir: introduce un elemento narrativo que só aporta distracción.

concordo.

o trailer de construcións en youtube

2008-11-19T08:50:00.005Z

xa está en youtube a primeira versión, a modo de trailer, da presentación de construcións en compostela o venres 14 de novembro.

é obra de lara bacelo á quen agradezo infinito pola profesionalidade e, sobre todo, polo cariño que puxo.

a estrea da longametraxe, dentro duns días.

construcións en compostela (2)

2008-11-14T12:28:00.004Z

mentres agardamos o vídeo, van tres fotos, xentileza do mario

construcións en compostela

2008-11-12T00:26:00.002Z

este xoves 13 ás 21:30 na casa das crechas de santiago de compostela presentamos construcións.

ogallá nos vexamos aló.

abruzzo

2008-11-12T00:22:00.002Z

o poema de esca e pedra desta semana nace dun artigo que fala dunha das rexións italianas que non coñezo.
da versión galega do artigo saltei á italiana, na procura de máis información a ver se atopaba algunha fenda pola que coarme.
e na sección "sport" atopei o nome do boxeador que, finalmente, foi o protagonista do poema.

iris, identificación biométrica

2008-11-05T13:40:00.001Z

tirando do fío do anecdotario ao que fai referencia o artigo da wikipedia, cheguei á famosísima portada de national geographic e aí naceu o poema.
a foto é unha ampliación (en branco e negro) dun dos ollos desa portada.

aquí está

2008-11-03T21:38:00.002Z

xa está na rúa construcións.

hoxe pódese mercar nas primeiras librarías e, para comezos da semana próxima estará distribuído por todo o país.
comparto convosco a miña alegría.

msnm

2008-10-29T09:58:00.003Z

hoxe sae un novo poema de "esca e pedra". esta vez sobre "msnm" que vén sendo a abreviatura de "metros sobre o nivel do mar".

o poema derivou, neste caso, polo lado da cartografía.

con referencia ás relacións interpersoais que vén sendo un dos leit-motifs dos meus poemas da última tempada.

a foto tireina eu sobre unha montaxe feita cun mapa e un rotulador.

o cacho do mapa é do concello de carballeda de valdeorras. cousas do azar.

poemas visuais de igor lugrís

2008-10-27T08:31:00.003Z

igor lugris vén de publicar unha serie de poemas visuais nunha galería de flickr.

recomendo vivamente que visitedes a páxina e leades e miredes. e non só porque eu teña participación, dun xeito ou doutro, nalgúns deses textos ;-)

poesía viva.

(sinto repetir posts. este pagaba a pena poñelo en toda parte)

spirit

2008-10-22T09:22:00.002+01:00

a idea deste poema naceu vendo unha película ou lendo un libro ou un poema (penso que a primeira opción é a boa) na que a unha persoa se lle disparaba unha serie de cuestións a partir da visión dunha fotografía da terra tomada dende o espazo.

non consigo lembrar de que película se trataba.

algunha pista?

esca e pedra

2008-10-22T09:20:00.001+01:00

acaba de saír publicado en culturagalega.org o primeiro poema da serie que titulei, con licencia creative commons do tío marcos da portela, "esca e pedra".

da esca nace a faísca e da faísca o lume.

eu collo unha entrada aleatoria da wikipedia e dela nace un poema.

30 entradas da wikipedia, 30 poemas (a un por semana) que irei escribindo dende agora e até maio.

espero que visitedes a páxina e que deixedes libremente os vosos comentarios neste vello e célebre blog que volve á vida.

a url: http://culturagalega.org/opinion/escaepedra/

mirar para este lado

2008-09-30T16:02:00.001+01:00

un novo proxecto-blog para seguir reflexionando

visitádeo (se queredes) aquí.

novidade e agradecemento

2008-09-25T10:02:00.022+01:00

novidade
veño de saber que construcións sairá publicado proximamente en edicións positivas.
como imaxinades, estou encantado!

agradecemento

a cada unha das persoas que incluíu un post no seu blog a propósito de todo este tema, o meu sincero agradecemento.
tamén a cada unha das persoas que puxo un comentario nalgúns destes posts ou nos artigos publicados na prensa dixital.
aos que están de acordo comigo e aos que non, porque estades debatindo sobre este tema dun modo serio, respectuoso e, sobre todo, falando de literatura!
supoño que a lista non será completa, pero aí vai unha lista posíbel (e que me desculpen se me despisto dalgún pero podemos ampliar a lista cantas veces faga falta!):

cabaret voltaire (tamén estoutro post)
a canción do náufrago
ferradura en tránsito (e engade)
fragmentos da galaxia
o levantador de minas (e...)
alfaias (e máis unha xurídica)
brétemas
ovnis e isoglossas (e tamén)
made in galiza
lándoas (e suma)
proxecto q
casatlántica (e máis)
dedos como vermes
o porto dos escravos
apocalipse do porco (e post-escribe)
O blog de Xosi
suroeste
Croques
ningures
alicia crece
selva de esmelle
trasalba
Manuel L. Rodríguez
Beliscos pequenos
Casa das Letras
Pájaros de papel
Coru-blogs
desorde

fallos e fallos

2008-09-23T16:09:00.005+01:00

como sabedes, o libro froito deste traballo no que moita xente participou, foi honrado co premio de poesía miguel gonzález garcés da deputación da coruña.
agora, a deputación fai lugar a unha impugnación presentada por xabier lama. os termos da impugnación veñen a dicir que a existencia deste blog implica a violación de dúas das bases do premio. a deputación consulta ao xurado e o xurado acorda facer lugar á impugnación.
como consecuencia, retíranlle o premio a construcións e outórganllo ao libro de xabier lama, que fora escollido en primeira instancia para concederlle o accésit.

penso que a decisión do xurado non se axusta a dereito e explícoo nunha carta aberta que veño de enviar aos medios de comunicación (pódese ler na web da asociación de escritores en lingua galega e en distintos sitios da rede como, por exemplo: en cabaret voltaire, n'o levantador de minas, ou n'a canción do náufrago). pero acepto a decisión do xurado tal e como a aceptei da vez anterior.

non vou negar que me fastidia quedarme sen as pelas, a quen lle sobran seis mil euros? pero o bonito dos premios é que un xurado escolla o teu libro para premialo. construcións foi escollido para lle outorgar o premio de poesía miguel gonzález garcés. quédome con iso.

doutra banda, a miña aposta pola rede para incorporar na literatura novas formas de facer non vai rematar por culpa deste incidente. de feito, en breve espero poder volver falar destas cousas con quen queira participar, nun proxecto que verá luz dentro da páxina culturagalega.org.

e queda aberto este blog para que sigamos falando do que toque a propósito das cousas que vaia escribindo.

xa que logo, vémonos na rede!

mentres tanto...

2006-10-04T13:21:00.000+01:00

ocupacións

2006-09-13T16:09:00.000+01:00

estes días a vida éncheseme con outras ocupacións.
xa haberá tempo para ocuparse destes fillos.

de regreso de corme

2006-08-25T07:40:00.000+01:00

voltei de corme hai xa case unha semana co libro moi corrixido, diría que practicamente rematado. pero a semana foi complicada e non tiven tempo de poñerme a transladar ao blog todos os cambios comentados como se debe.

vai ser cousa de paciencia.

pechado por reflexión

2006-06-13T17:07:00.000+01:00

finalmente decidín poñerlle o peche ao proceso de escrita do libro.
agora estou deixándoo levedar soíño para, dentro dalgunhas semanas, recoller todo o material e os comentarios recibidos e poñerme a traballar seriamente na corrección dos textos.
será unha tarefa complicada, penso, por iso quero ser estricto neste período de repouso así podo enfrontarme cos textos cun mínimo de distancia sempre tan difícil de acadar.
non sei cando nos veremos, que diría rosalía. agosto?

tres fotogramas

2006-05-01T14:50:00.000+01:00

velaquí tres fotogramas consecutivos da mesma paisaxe.

xa estou na recta final do libro. teño un par de poemas que quero escribir, algún que quero reescribir e despois vou poñer o esforzo en revisar e corrixir.

é curiosa a sensación que se ten cando ves o final do camiño.

dous

2006-04-08T22:25:00.000+01:00

hoxe foi un día produtivo. van dous poemas.

o primeiro débollo a raymond carver. non porque lle collese a el a idea, pero o libro que estou lendo tróuxome á cabeza unha vella imaxe da que sempre quixera escribir algo. aí está.

o segundo é unha incursión novidosa dentro do libro (e para min, en xeral, nunca andara estes camiños antes). non sei se finalmente quedará alí pero de momento sóltoo a ver como voa.

a radio

2006-04-06T16:10:00.000+01:00

dunha historia da radio, este poema. había moitos finais posíbeis para a historia. despois de varias voltas quedei con tres e, como non me decidía por ningún deles, decidín poñer os tres.
na banda da dereita tendes un cadriño onde podedes escoller o que voso final preferido.
eu xa fixen a miña escolla pero polo de agora non vola vou contar. igual o resultado da enquisa faime reconsiderar a miña decisión.

pequenos axustes (2)

2006-03-29T17:05:00.000+01:00

fixen pequenísimos cambios nalgúns poemas: indecisión, miradas e liña 41.

o cambio de indecisión é, despois de deixar pousar a idea, unha das suxestións que fixera sz.

en miradas foi un axuste nalgún fragmento que resultaba pouco limpo.

en liña 41, un pequeno retoque no final.

é curioso, como estou escribindo no pda, e alí a pantalla é estreita e non collen algúns dos versos, afágome a velos con outros cortes diferentes. hoxe transladei aos poemas algúns deses cortes.

memoria

2006-03-21T15:54:00.000Z

un pequeno poema sobre a memoria cotiá. pequeno non por lonxitude, senón polo universo que quere debuxar.

pequeno en relación con outras formas de memoria ás que nestes días se atende.

agochar algunhas cartas

2006-03-13T15:24:00.000Z

unha secuencia aproximadamente habitual:

unha historia vivida (oída, lida) impacta no sitio correcto do maxín.

ocórreseme o poema e empezo a escribilo.

o primeiro impulso é ser fiel á historia, aínda que hai algo nos personaxes que non acaba de cadrarme. aínda así, acabo de escribir a versión-fiel.

e antes de que me dea tempo de colgalo, o incomodo medra. xa que logo, regreso ao poema. o traballo vai nunha dirección moi concreta, agochar as cartas.

omitindo deliberadamente información consigo: que cada quen poida poñer aos personaxes a cara que prefira, que cada quen poida poñerlle á historia o seu final.

hai información abondo como para que un lector poida construír máis ou menos fielmente a historia "orixinal" (chamémoslle así)? non o sei, é difícil porque eu si teño a historia orixinal na cabeza e, aínda que fun deixando pistas, con frecuencia esas pistas poden resultar insuficientes.

importa que ninguén poida reconstruír a historia orixinal? claramente non, non me importa. máis aínda: agochando a historia orixinal gaño en probabilidades de que cada un constrúa a historia que cada un pode-sabe-precisa. creo que é unha boa estratexia.

velaquí o resultado.

narradores (2)

2006-03-09T15:38:00.000Z

tiña claro que cumpría cambiar o final do poema "lectura" pero o comentario de desorde fixo que puxese un pouco máis de atención ao texto todo que, efectivamente, era confuso.

non sei se desta quedaría máis claro. agardo que si.

pequenos axustes

2006-03-01T18:54:00.000Z

veño de engadir unha nova versión do poema antes titulado "nunha cafetaría" que agora, seguindo a idea de hai uns días, xa non ten título.

non ten correccións relevantes, pero si algúns cambios para que o texto resultase algo máis fluído, quitei algunhas cousas e substituín algunha palabra que se repetía en exceso.

non creo que estea de todo listo pero si que mellora un algo.

narradores

2006-02-28T10:29:00.000Z

para afondar na discusión xa iniciada sobre os límites dos xéneros, este novo poema no que engado no saco do remexido xenérico o ensaio. un pouquiño nada máis. o suficiente para empezar un día que promete ser produtivo noutros ámbitos: levo semanas pensando que teño que escribir para este venres a presentación dun libro complexo e fermoso de baldo ramos e no que vai desta mañá de sol xa fun quen de parir os primeiros parágrafos.

ollos

2006-02-26T20:50:00.000Z

velaquí un poema no que tentei, probabelmente en van, poñer en palabras unha historia que teño dando voltas na cabeza dende hai anos. creo que dende 1993, cando tomei esta fotografía.

nas últimas semanas empecei a escribir o poema moitas veces sen éxito. o psicopoeta deume, tal vez, a clave. de todos os xeitos teño a impresión de que o poema finalmente eludiu a dificuldade e colleu outro camiño. coma se tivese vida propia. e tal vez teña.

diagnóstico

2006-02-20T21:29:00.000Z

non sei a que escritor lle oín dicir que todos escribimos a partir das nosas propias experiencias. algo disto comenta un personaxe da película que vin onte. eu digo que, a falta dunha vida aventureira, eu, que non rompo esa regra, escribo sobre todo a partir das miñas experiencias como lector. velaquí un exemplo.

ata o de agora viña engadindo os novos textos a continuación do último, sen atender demasiado aínda á orde que os textos terán no libro. pero este non o puxen a continuación de "correo" porque me pareceu que non cadraba alí.

tampouco non pensei moito onde o metía, só deixeino caer no medio da lista.

primeiros retoques

2006-02-18T11:05:00.000Z

nas últimas dúas semanas non tiven tempo de sentar a actualizar o libro na web pero si estiven traballando nalgunhas correccións.

os pequenos cambios que lle fixen a "liña 41" motiváronos, como xa comentei, as lecturas en alto. fixen dúas e as dúas veces improvisei as mesmas modificacións a medida que lía. xa que logo, eses cambios impuxéronse no texto.

o outro que modifico é, tal como anunciara, "pudor". púxeno en terceira persoa. a ver que tal resulta así. e fixen unha nova versión do remate da terceira estrofa que nunca me convencera demasiado.

outra cousa. o asunto dos títulos. algúns poemas teñen títulos claros. a outros púxenlle título por manter un criterio coherente ao longo do libro. pero iso forzou títulos realmente malos como "a soidade procurada" ou "nunha cafetaría". penso, xa que logo, que vou cambiar de idea: voulle deixar algúns títulos funcionais (como, por exemplo, os dous poemas que corrixo hoxe) e ao resto, a medida que vaia tocando neles, seguramente voullos ir quitando.

ler en voz alta

2006-02-03T13:56:00.000Z

onte estiven nun recital na coruña e aproveitei para ler en público algúns textos do libro en construción.

sempre é interesante ver a resposta da xente aos textos novos. pero a maiores, é un exercicio moi útil ler en alto. deberiamos facelo máis na casa. cantan moitísimo os problemas do texto cando o les en alto.

así que, se a fin de semana non é demasiado agobiada (ou demasiado apalancada) é posíbel que para a semana que vén haxa versións máis ou menos corrixidas dos textos.

a máis gorda vai ser esta: vou tentar unha versión en terceira persoa de "pudor". apuntaba veloso que o texto lle resultaba dalgún xeito diferente aos demais. el falaba de que tiña "unha vida propia" e gustáballe. sospeito que poñer o poema en terceira persoa probabelmente mate esa "vida propia" pero achegue máis o poema ao ton xeral do resto.

tampouco estou seguro de que a cousa vaia funcionar. eu vou facer o experimento. xa se verá.

correo

2006-01-30T15:51:00.000Z

despois dunha semana acatarrada, un novo poema.

pudor

2006-01-21T23:26:00.000Z

acabo de engadir estoutro texto recén parido. botei un bo anaco (dende que se me ocorreu a idea ata que sentei a escribir) facendo unha primeira construción mental do poema. pero cando sento a escribir a maior parte das cousas van quedando en ideas e o poema transcorre un pouco libremente.

igual era a isto ao que nos referiamos con celso e con estevo un día, non hai moito, cando comiamos xuntos. e todo está fiado cun post da vaca de hai un tempo.

dicia a vaca naquel post que cando se fai a construción mental do poema, a "paisaxe", digamos, énchese de imaxes visuais, olfativas, táctiles, de mínimos detalles que, no momento de sentarse a escribir, un non é quen de deitar en palabras.

a vaca pensaba que iso era unha demostración das limitacións da linguaxe, pero esa idea comezou a desmontarlla "aisa" traendo a colación a heidegger e a súa teoría de que o pensamento é lingüístico e, xa que logo, non se pode pensar nada que non poida ser posto en palabras.

efectivamente, cando se traslada ao papel un texto previamente construído na cabeza, moitas cousas non chegan ao papel. pero non é que un non sexa capaz de transcribir esas ideas en palabras. é, simplemente, que un selecciona de todos os detalles da imaxe, aqueles que son precisos para a construción do poema. poderíase describir todo, pero sería farragosísimo e o resultado, probabelmente, inútil. a selección do que se di fai que a paisaxe do poema quede chea de pequenos ocos nos que o lector pode engadir elementos da súa propia colleita. eses ocos (e non o que está dito) son os que fan que o poema teña sentido para os demais.

non pensei en todo isto cando construía mentalmente o poema. nin tampouco cando o transcribía. afortunadamente. pero si cando o relín antes de engadilo ao libro.

títulos

2006-01-19T13:25:00.000Z

cousa dificilísima poñer títulos. e porque algún dos poemas tiña, estou forzando títulos para os demais. sobre todo para os que van aparecendo novos. e debo recoñecer que saen títulos malísimos.

tampouco era fundamental o que tiña antes de empezar... igual o que debía facer é quitalos todos. xa se sabe. a tesoura...

esperar

2006-01-18T23:08:00.000Z

un poema agradecido. acaba de nacer.

ogallá sexa igual
algún día
a todo o recibido

a soidade procurada

2006-01-18T22:34:00.000Z

un mal título para un poema que está moi moi verde.

en realidade isto é un exceso de ousadía. este poema non son, probabelmente, máis que apuntes para un poema.

pero hoxe penso que debe ir a carón dos demais.

tesouras

2006-01-17T15:03:00.000Z

a principal ferramenta do escritor non é o lápiz (boli, pluma, rotulador ou teclado) senón as tesouras.

na súa homenaxe, estou considerando retirar dous textos do libro.

son os titulados "os días de despois (I)" e "os días de despois (II)". non é que non me gusten. gústanme, pero creo que non seguen a liña do resto de textos do libro.

xa mo parecera cando os incluín, pero como o primeiro paso era armar o feixe, quedaron.

son textos cun cariz máis intimista, próximo aos poemas doutros libros anteriores (mapas... ou mesmo lúa gris).

o que me gustaría facer agora ten outro ton, máis narrativo e continuando o ton máis reflexivo dalgúns poemas de derrotas.

pero tampouco se trata de deixarse levar por un primer impulso. vounos marcar como para borrar e vouno pensar uns días.

comeza o proceso

2006-01-15T12:48:00.000Z

o primeiro paso é recoller un feixe de textos escritos nos últimos meses que teño a sensación de que poden levarse ben xuntos.

empezar a pensar nun libro por unha sensación pode resultar excesivo. a realidade é que esa sensación é o único que teño polo de agora, a maiores deste feixe de textos soltos.

vexo que varios textos teñen título (cousa pouco habitual en min). outros non. presa da miña necesidade de orde, vou dar título aos poemas que non o teñen.

algúns textos naceron por encargas. outros transcribinllos á vaca para o seu blog e, finalmente, outros naceron como comentarios no blog de sara jess.

agora están reunidos e empezan a andar xuntos. a ver que dan de si.